har ek baat pe kahte ho tum k tu kia hai

har ek baat pe kahte ho tum k tu kia hai

har ek baat pe kahte ho tum k tu kia hai
tumhi kaho k ya Andaz-e-Guftagu  kia ha

na sho.ale main ye karishma na barq main ye adaa
koi btao ki wo shoḳh-e-tund-ḳhu kia ha

ye rashk hai ki wo hota hai hm-suḳhan tum se
wagarna ḳhauf-e-bad-Amozi-e-adu kia ha

chipak raha hai badan par lahuse pairahan
hamaare jaib ko ab hajat-e-rafo kia ha

jalaa ha jism jahaan dil bhii jal gayaa ho ga
kuraidte ho jo ab raakh justa-ju kia ha

ragoon main dauḌte phirne ke ham nahi qaail
jab aankh hii se na Tapkaa to phir laho kia ha

wo chiiz jis ke liye ham ko ho bahisht aziiz
siva.e baada-e-gulfam-e-mushk-buu kia ha

piyon sharaab agar ḳhum bi dekh lun do-chaar
ye shissha o qadah o kuuza o subo kia ha

rahii na taaqat-e-guftar aur agar ho bi
to kis umiid pe kahiye ki aarzuu kia ha

howa hai shah kaa musaahib phire hai itraata
wagarna shahar main ‘Ghalib’ ki aabro kia hai

ہر ایک بات پہ کہتے ہو تم کہ تو کیا ہے

ہر ایک بات پہ کہتے ہو تم کہ تو کیا ہے
تمہیں کہو کہ یہ انداز گفتگو کیا ہے

نہ شعلہ میں یہ کرشمہ نہ برق میں یہ ادا
کوئی بتاؤ کہ وہ شوخ تند خو کیا ہے

یہ رشک ہے کہ وہ ہوتا ہے ہم سخن تم سے
وگرنہ خوف بد آموزی عدو کیا ہے

چپک رہا ہے بدن پر لہو سے پیراہن
ہمارے جیب کو اب حاجت رفو کیا ہے

جلا ہے جسم جہاں دل بھی جل گیا ہوگا
کریدتے ہو جو اب راکھ جستجو کیا ہے

رگوں میں دوڑتے پھرنے کے ہم نہیں قائل
جب آنکھ ہی سے نہ ٹپکا تو پھر لہو کیا ہے

وہ چیز جس کے لیے ہم کو ہو بہشت عزیز
سوائے بادۂ گلفام مشک بو کیا ہے

پیوں شراب اگر خم بھی دیکھ لوں دو چار
یہ شیشہ و قدح و کوزہ و سبو کیا ہے

رہی نہ طاقت گفتار اور اگر ہو بھی
تو کس امید پہ کہیے کہ آرزو کیا ہے

ہوا ہے شہہ کا مصاحب پھرے ہے اتراتا
وگرنہ شہر میں غالبؔ کی آبرو کیا ہے