ترے غم کو جاں کی تلاش تھی ترے جاں نثار چلے گئے

تری رہ میں کرتے تھے سر طلب سر رہ گزار چلے گئے

تری کج ادائی سے ہار کے شب انتظار چلی گئی

مرے ضبط حال سے روٹھ کر مرے غم گسار چلے گئے

نہ سوال وصل نہ عرض غم نہ حکایتیں نہ شکایتیں

ترے عہد میں دل زار کے سبھی اختیار چلے گئے

یہ ہمیں تھے جن کے لباس پر سر رہ سیاہی لکھی گئی

یہی داغ تھے جو سجا کے ہم سر بزم یار چلے گئے

نہ رہا جنون رخ وفا یہ رسن یہ دار کرو گے کیا

جنہیں جرم عشق پہ ناز تھا وہ گناہ گار چلے گئے

tire gham ko jaan ki talash thi tire jaan nisaar chale gaye

tiri rah mein karte the sar talab sar e rahguzar chale gaye

tiri kaj adai se haar ke shab e intizar chali gai

mire zabt e haal se rooth kar mire gham gusar chale gaye

na sawal e vasl na arz e gham na hikayaten na shikayaten

tire ahd mein dil e zaar ke sabhi ikhtiyar chale gaye

ye hamin the jin ke libaas par sar e rah siyahi likhi gai

yahi daagh the jo saja ke ham sar e bazm e yar chale gaye

na raha junoon e rukh e wafa ye rasan ye daar karoge kya

jinhen jurm e ishq pe naaz tha vo gunahgar chale gaye