کب یاد میں تیرا ساتھ نہیں کب ہات میں تیرا ہات نہیں

صد شکر کہ اپنی راتوں میں اب ہجر کی کوئی رات نہیں

مشکل ہیں اگر حالات وہاں دل بیچ آئیں جاں دے آئیں

دل والو کوچۂ جاناں میں کیا ایسے بھی حالات نہیں

جس دھج سے کوئی مقتل میں گیا وہ شان سلامت رہتی ہے

یہ جان تو آنی جانی ہے اس جاں کی تو کوئی بات نہیں

میدان وفا دربار نہیں یاں نام و نسب کی پوچھ کہاں

عاشق تو کسی کا نام نہیں کچھ عشق کسی کی ذات نہیں

گر بازی عشق کی بازی ہے جو چاہو لگا دو ڈر کیسا

گر جیت گئے تو کیا کہنا ہارے بھی تو بازی مات نہیں

kab yaad mein tera saath nahin kab haat mein tera haat nahin

sad shukr ki apni raaton mein ab hijr ki koi raat nahin

mushkil hain agar halaat wahan dil bech aayen jaan de aayen

dil walon koocha e jaanan mein kya aise bhi halaat nahin

jis dhaj se koi maqtal mein gaya wo shaan salamat rahti hai

ye jaan to aani jaani hai is jaan ki to koi baat nahin

maidan e wafa darbar nahin yaan naam o nasab ki pooch kahan

aashiq to kisi ka naam nahin kuchh ishq kisi ki zaat nahin

gar baazi ishq ki baazi hai jo chaho laga do dar kaisa

gar jeet gaye to kya kehna haare bhi to baazi maat nahin