درد سے میرے ہے تجھ کو بے قراری ہائے ہائے
کیا ہوئی ظالم تری غفلت شعاری ہائے ہائے
تیرے دل میں گر نہ تھا آشوب غم کا حوصلہ
تو نے پھر کیوں کی تھی میری غم گساری ہائے ہائے
کیوں مری غم خوارگی کا تجھ کو آیا تھا خیال
دشمنی اپنی تھی میری دوست داری ہائے ہائے
عمر بھر کا تو نے پیمان وفا باندھا تو کیا
عمر کو بھی تو نہیں ہے پائیداری ہائے ہائے
زہر لگتی ہے مجھے آب و ہوائے زندگی
یعنی تجھ سے تھی اسے نا سازگاری ہائے ہائے
گل فشانی ہائے ناز جلوہ کو کیا ہو گیا
خاک پر ہوتی ہے تیری لالہ کاری ہائے ہائے
شرم رسوائی سے جا چھپنا نقاب خاک میں
ختم ہے الفت کی تجھ پر پردہ داری ہائے ہائے
خاک میں ناموس پیمان محبت مل گئی
اٹھ گئی دنیا سے راہ و رسم یاری ہائے ہائے
ہاتھ ہی تیغ آزما کا کام سے جاتا رہا
دل پہ اک لگنے نہ پایا زخم کاری ہائے ہائے
کس طرح کاٹے کوئی شب ہائے تار برشگال
ہے نظر خو کردۂ اختر شماری ہائے ہائے
گوش مہجور پیام و چشم محروم جمال
ایک دل تس پر یہ نا امید واری ہائے ہائے
عشق نے پکڑا نہ تھا غالبؔ ابھی وحشت کا رنگ
رہ گیا تھا دل میں جو کچھ ذوق خواری ہائے ہائے
Dard se mere hai tujh ko beqarari haaye haaye
Dard se mere hai tujh ko beqarari haaye haaye
Kiya hui zalim teri ghafalt shuari haaye haaye
Tere dil mein gar nah tha aashob-e-gham ka hosla
To ne phir kyun ki thi meri gham gusari haaye haaye
Kyun meri gham khwargi ka tujh ko aaya tha khayal
Dushmani apni thi meri dost dari haaye haaye
Umr bhar ka to ne peiman-e-wafa bandha to kya
Umr ko bhi to nahi hai paidari haaye haaye
Zehr lagti hai mujhe aab-o-hawa-e-zindagi
Yani tujh se thi ise na sazgari haaye haaye
Gul fishani haaye naz jalwa ko kya ho gaya
Khak par hoti hai teri lalahkari haaye haaye
Sharm-e-ruswai se ja chhupna niqab-e-khak mein
Khatm hai ulfat ki tujh par parda dari haaye haaye
Khak mein namoos-e-peiman-e-mohabbat mil gayi
Uth gayi duniya se rah-o-rasm-e-yaari haaye haaye
Haath hi taigh aazma ka kaam se jata raha
Dil pe ek lagne na paya zakhm-e-kari haaye haaye
Kis tarah kaate koi shab-e-haaye tar barshgal
Hai nazar khw kar da akhtar shumari haaye haaye
Gosh-e-mehjoor payam-o-chashm-e-mahroom-e-jamal
Ek dil tas par yeh na umidwari haaye haaye
Ishq ne pakda nah tha Ghalib abhi wehshat ka rang
Reh gaya tha dil mein jo kuch zauq-e-khuwari haaye haaye
