آج یوں موج در موج غم تھم گیا اس طرح غم زدوں کو قرار آ گیا

جیسے خوشبوئے زلف بہار آ گئی جیسے پیغام دیدار یار آ گیا

جس کی دید و طلب وہم سمجھے تھے ہم رو بہ رو پھر سر رہ گزار آ گیا

صبح فردا کو پھر دل ترسنے لگا عمر رفتہ ترا اعتبار آ گیا

رت بدلنے لگی رنگ دل دیکھنا رنگ گلشن سے اب حال کھلتا نہیں

زخم چھلکا کوئی یا کوئی گل کھلا اشک امڈے کہ ابر بہار آ گیا

خون عشاق سے جام بھرنے لگے دل سلگنے لگے داغ جلنے لگے

محفل درد پھر رنگ پر آ گئی پھر شب آرزو پر نکھار آ گیا

سرفروشی کے انداز بدلے گئے دعوت قتل پر مقتل شہر میں

ڈال کر کوئی گردن میں طوق آ گیا لاد کر کوئی کاندھے پہ دار آ گیا

فیضؔ کیا جانیے یار کس آس پر منتظر ہیں کہ لائے گا کوئی خبر

مے کشوں پر ہوا محتسب مہرباں دل فگاروں پہ قاتل کو پیار آ گیا

aaj yuuñ mauj-dar-mauj ġham tham gayā is tarah ġham-zadoñ ko qarār aa gayā

jaise ḳhush-bū-e-zulf-e-bahār aa ga.ī jaise paiġhām-e-dīdār-e-yār aa gayā

jis kī dīd-o-talab vahm samjhe the ham rū-ba-rū phir sar-e-rahguzār aa gayā

sub.h-e-fardā ko phir dil tarasne lagā umr-e-rafta tirā e’tibār aa gayā

rut badalne lagī rañg-e-dil dekhnā rañg-e-gulshan se ab hāl khultā nahīñ

zaḳhm chhalkā koī yā koī gul khilā ashk umDe ki abr-e-bahār aa gayā

ḳhūn-e-ushshāq se jaam bharne lage dil sulagne lage dāaġh jalne lage

mahfil-e-dard phir rañg par aa ga.ī phir shab-e-ārzū par nikhār aa gayā

sarfaroshī ke andāz badle ga.e dāvat-e-qatl par maqtal-e-shahr meñ

Daal kar koī gardan meñ tauq aa gayā laad kar koī kāñdhe pe daar aa gayā

‘faiz’ kyā jāniye yār kis aas par muntazir haiñ ki lā.egā koī ḳhabar

mai-kashoñ par huā mohtasib mehrbāñ dil-figāroñ pe qātil ko pyār aa gayā