ہم پر تمہاری چاہ کا الزام ہی تو ہے

ہم پر تمہاری چاہ کا الزام ہی تو ہے
دشنام تو نہیں ہے یہ اکرام ہی تو ہے

دل ناامید تو نہیں ناکام ہی تو ہے
لمبی ہے غم کی شام مگر شام ہی تو ہے

کرتے ہیں جس پہ طعن کوئی جرم تو نہیں
شوق فضول و الفت ناکام ہی تو ہے

دل مدعی کے حرف ملامت سے شاد ہے
اے جان جاں یہ حرف ترا نام ہی تو ہے

دست فلک میں گردش تقدیر تو نہیں
دست فلک میں گردش ایام ہی تو ہے

آخر تو ایک روز کرے گی نظر وفا
وہ یار خوش خصال سر بام ہی تو ہے

بھیگی ہے رات فیضؔ غزل ابتدا کرو
وقت سرود درد کا ہنگام ہی تو ہے

ham par tumhari chaah ka ilzam hi to hai
dushnam to nahin hai ye ikram hi to hai

dil na-umid to nahin nakam hi to hai
lambi hai gham ki shaam magar shaam hi to hai

karte hain jis pe tan koi jurm to nahin
shauq-e-fuzul o ulfat-e-nakam hi to hai

dil mudda’i ke harf-e-malamat se shaad hai
ai jaan-e-jaan ye harf tira naam hi to hai

dast-e-falak men gardish-e-taqdir to nahin
dast-e-falak men gardish-e-ayyam hi to hai

aakhir to ek roz karegi nazar vafa
vo yaar-e-khush-khisaal sar-e-baam hi to hai

bhigi hai raat ‘faiz’ ghazal ibtida karo
vaqt-e-sarod dard ka hangam hi to hai