گلوں میں رنگ بھرے باد نوبہار چلے

گلوں میں رنگ بھرے باد نوبہار چلے
چلے بھی آؤ کہ گلشن کا کاروبار چلے

قفس اداس ہے یارو صبا سے کچھ تو کہو
کہیں تو بہر خدا آج ذکر یار چلے

کبھی تو صبح ترے کنج لب سے ہو آغاز
کبھی تو شب سر کاکل سے مشکبار چلے

بڑا ہے درد کا رشتہ یہ دل غریب سہی
تمہارے نام پہ آئیں گے غم گسار چلے

جو ہم پہ گزری سو گزری مگر شب ہجراں
ہمارے اشک تری عاقبت سنوار چلے

حضور یار ہوئی دفتر جنوں کی طلب
گرہ میں لے کے گریباں کا تار تار چلے

مقام فیضؔ کوئی راہ میں جچا ہی نہیں
جو کوئے یار سے نکلے تو سوئے دار چلے

gulon mein rang bhare baad-e-nau-bahaar chale

Gulon me rang bhare baad-e-nau-bahaar chale
Chale bhi aao ke gulshan ka kaarobaar chale

Qafas udaas hai yaaro saba se kuch to kaho
Kahin to bahr-e-khuda aaj zikr-e-yaar chale

Kabhi to subah tire kunj-e-lab se ho aaghaaz
Kabhi to shab sar-e-kakul se mushk-baar chale

Bada hai dard ka rishta ye dil ghareeb sahi
Tumhare naam pe aayein ge gham-gusaar chale

Jo hum pe guzri so guzri magar shab-e-hijraan
Hamare ashk tiri aaqibat sanvaar chale

Huzoor-e-yaar hui daftar-e-junoon ki talab
Girah me le ke garebaan ka taar taar chale

Maqaam Faiz koi raah me jacha hi nahin
Jo koo-e-yaar se nikle to su-e-daar chale