sharmindagi hai ham ko bahut ham mile tumhen

شرمندگی ہے ہم کو بہت ہم ملے تمہیں
تم سر بہ سر خوشی تھے مگر غم ملے تمہیں

میں اپنے آپ میں نہ ملا اس کا غم نہیں
غم تو یہ ہے کہ تم بھی بہت کم ملے تمہیں

ہے جو ہمارا ایک حساب اس حساب سے
آتی ہے ہم کو شرم کہ پیہم ملے تمہیں

تم کو جہان شوق و تمنا میں کیا ملا
ہم بھی ملے تو درہم و برہم ملے تمہیں

اب اپنے طور ہی میں نہیں تم سو کاش کہ
خود میں خود اپنا طور کوئی دم ملے تمہیں

اس شہر حیلہ جو میں جو محرم ملے مجھے
فریاد جان جاں وہی محرم ملے تمہیں

دیتا ہوں تم کو خشکئ مژگاں کی میں دعا
مطلب یہ ہے کہ دامن پر نم ملے تمہیں

میں ان میں آج تک کبھی پایا نہیں گیا
جاناں جو میرے شوق کے عالم ملے تمہیں

تم نے ہمارے دل میں بہت دن سفر کیا
شرمندہ ہیں کہ اس میں بہت خم ملے تمہیں

یوں ہو کہ اور ہی کوئی حوا ملے مجھے
ہو یوں کہ اور ہی کوئی آدم ملے تمہیں

sharmindagi hai ham ko bahut ham mile tumhen

sharmindagi hai ham ko bahut ham mile tumhen
tum sar ba sar khushi the magar gham mile tumhen

main apne aap men na mila is ka gham nahin
gham to ye hai ki tum bhi bahut kam mile tumhen

hai jo hamara ek hisab us hisab se
aati hai ham ko sharm ki paiham mile tumhen

tum ko jahan e shauq o tamanna men kya mila
ham bhi mile to darham o barham mile tumhen

ab apne taur hi men nahin tum so kaash ki
khud men khud apna taur koi dam mile tumhen

is shahr e hila ju men jo mahram mile mujhe
fariyad jan e jaan vahi mahram mile tumhen

deta hun tum ko khushki e mizhgan ki main dua
matlab ye hai ki daman e punam mile tumhen

main un men aaj tak kabhi paya nahin gaya
janan jo mere shauq ke alam mile tumhen

tum ne hamare dil men bahut din safar kiya
sharminda hain ki us men bahut kham mile tumhen

yun ho ki aur hi koi hava mile mujhe
ho yun ki aur hi koi adam mile tumhen