Naya Ek Rishta Paida Kyun karen Hum

naya ik rishta paida kyun karen ham
bichhadna hai to jhagdah kyun karen ham

khamoshi se ada ho rasm e doori
koi hangama barpa kyun karen ham

ye kafi hai ki ham dushman nahin hain
wafadari ka dawa kyun karen ham

wafa ikhlaas qurbani mohabbat
ab in lafzon ka peecha kyun karen ham

suna den ismat e maryam ka qissa
par ab is baab ko wa kyun karen ham

zulekha e azizan baat ye hai
bhala ghatay ka sauda kyun karen ham

hamari hi tamanna kyun karo tum
tumhari hi tamanna kyun karen ham

kiya tha ahd jab lamhon mein ham ne
to saari umr ifa kyun karen ham

utha kar kyun na phenken saari cheezen
faqat kamron mein tahla kyun karen ham

jo ik nasl e faromaya ko pahunche
wo sarmaya ikattha kyun karen ham

nahin duniya ko jab parwa hamari
to phir duniya ki parwa kyun karen ham

barahna hain sar e bazaar to kya
bhala andhon se parda kyun karen ham

hain bashinde usi basti ke ham bhi
so khud par bhi bharosa kyun karen ham

chaba len kyun na khud hi apna dhancha
tumhein ratib muhayya kyun karen ham

padi rehne do insanon ki lashein
zamin ka bojh halka kyun karen ham

ye basti hai musalmanon ki basti
yahan kar e masihah kyun karen ham

نیا اک رشتہ پیدا کیوں کریں ہم

نیا اک رشتہ پیدا کیوں کریں ہم
بچھڑنا ہے تو جھگڑا کیوں کریں ہم

خموشی سے ادا ہو رسم دوری
کوئی ہنگامہ برپا کیوں کریں ہم

یہ کافی ہے کہ ہم دشمن نہیں ہیں
وفا داری کا دعویٰ کیوں کریں ہم

وفا اخلاص قربانی محبت
اب ان لفظوں کا پیچھا کیوں کریں ہم

سنا دیں عصمت مریم کا قصہ
پر اب اس باب کو وا کیوں کریں ہم

زلیخائے عزیزاں بات یہ ہے
بھلا گھاٹے کا سودا کیوں کریں ہم

ہماری ہی تمنا کیوں کرو تم
تمہاری ہی تمنا کیوں کریں ہم

کیا تھا عہد جب لمحوں میں ہم نے
تو ساری عمر ایفا کیوں کریں ہم

اٹھا کر کیوں نہ پھینکیں ساری چیزیں
فقط کمروں میں ٹہلا کیوں کریں ہم

جو اک نسل فرومایہ کو پہنچے
وہ سرمایہ اکٹھا کیوں کریں ہم

نہیں دنیا کو جب پروا ہماری
تو پھر دنیا کی پروا کیوں کریں ہم

برہنہ ہیں سر بازار تو کیا
بھلا اندھوں سے پردہ کیوں کریں ہم

ہیں باشندے اسی بستی کے ہم بھی
سو خود پر بھی بھروسا کیوں کریں ہم

چبا لیں کیوں نہ خود ہی اپنا ڈھانچہ
تمہیں راتب مہیا کیوں کریں ہم

پڑی رہنے دو انسانوں کی لاشیں
زمیں کا بوجھ ہلکا کیوں کریں ہم

یہ بستی ہے مسلمانوں کی بستی
یہاں کار مسیحا کیوں کریں ہم